കവിത

മനക്കോട്ട

ഭൂമിയിലിടമില്ലാത്തതിനാലാണ്`
ഒരു തുണ്ട് സ്വപ്നലോകം
മനക്കണ്ണില്‍ നിന്നും കീറിയെടുത്ത്
ആകാശക്കോട്ട മെനഞ്ഞത്...

പരിഹാസത്തിന്റെ
ചാട്ടുളികളില്‍ നിന്നും
നിസ്സഹായതയിലേക്കുള്ള
ഒളിച്ചോട്ടം;
മോഹച്ചുഴികള്‍ കൊണ്ടൊരു തടയണ --
ഇതൊക്കെയായിരുന്നു എന്റെ
കൂ (ടു)റു മാറ്റ രഹസ്യങ്ങള്‍...

മനോകാമനകള്‍ക്ക് രമിക്കാന്‍
ഋതുക്കള്‍ കൊണ്ട്
ശരശയ്യ ഒരുക്കിയാണ്‌
ഇപ്രാവശ്യത്തെ
പുതുവര്‍ഷാചരണം...
സ്വപ്നക്കുരുക്കില്‍
കാല്‍ വഴുതി വീഴുന്നവര്‍ക്ക്
സ്വാഗതം !

കവിത

മറുവാക്ക്


നാട്ടിടവഴിയിലൂടെ
ഒറ്റയ്ക്കു നടക്കുമ്പോള്‍‍
നിങ്ങളൊരു
നാഗരികാനാണോയെന്നു
കാറ്റു കിന്നാരം ചോദിയ്ക്കും

ഗൃഹാതുരതകള്‍
തോല്‍ സഞ്ചിയില്‍
തൂക്കി നടന്ന
കാഥികനായിരുന്നില്ലേയെന്നു
കാലം കണ്ണു തുറിയ്ക്കും

നാടുകള്‍ അടിക്കടി
നഗരവല്ക്കരിക്കപ്പെടുമ്പോള്‍
നോക്കുകുത്തികളായി
നിലകൊള്ളുക നിങ്ങളെഴുതിയ
കള്ളക്കവിതകള്‍ മാത്രമായിരിക്കുമെന്നു
നാളെയൊരു നാട്ടുകവി
കളിയാക്കിച്ചിരിക്കും?